All kośas › Nānārtharatnamālā

Nānārtharatnamālā Nānārtharatnamālā

Irugapa Daṇḍādhinātha · Nānārtharatnamālā of Irugapa Daṇḍādhinātha · Deccan College, Post-Graduate & Research Institute, Poona · 1954 A.D. · Bellikoth Ramachandra Sharma

1,356 verses · text only, tagging comes next

एकाक्षरकाण्डः

॥ एकाक्षरकाण्डः ॥

अकारो ब्रह्मविष्ण्वीशकमठेष्वगणे रणे ।गौरवेऽन्तःपुरे हेतौ भूषणेऽङ्घ्रावुमेज्ययोः ॥

1.1 · p. 2

अनुष्टुप्

आकारस्तु घटे भावे परितापे पितामहे ।इकारः फणिरत्नार्चिःष्वग्रतोऽर्थगुहार्थयोः ॥

1.2 · p. 2

अनुष्टुप्

हरे करेणौ कक्ष्यान्ते निशाकरकरे स्मरे ।ईकारोऽब्जदले लक्ष्म्यां वाण्यां कमलकेसरे ॥

1.3 · p. 2

अनुष्टुप्

रशनायां शक्रचापे बाणे फणिनि कन्दरे ।उकारः क्षत्रिये नेत्रे हरमौलौ हरे हरौ ॥

1.4 · p. 3

अनुष्टुप्

तापसे व्रतचर्यायां मेघे च सरिदन्तरे ।ऊकारः पुरुषे चन्द्रे राजपुत्रे गजे सुरे ॥

1.5 · p. 3

अनुष्टुप्

प्राङ्गणोपमयोः पूर्णकुम्भे वणिजि रक्षणे ।ऋकारः कुञ्जरे शैले धीभेदे देवमातरि ॥

1.6 · p. 3

अनुष्टुप्

भावे देवे रिपौ नद्यां सुरायां विवरे दिवि ।ॠक्रारश्चिकुरे सर्पदृष्ट्या विगतसंपदि ॥

1.7 · p. 3

अनुष्टुप्

हिमपद्मादितिस्वर्गधनभूषाभुजाम्बुषु ।लृकारो दन्तिनां दन्ते कुलीरकपिदन्तयोः ॥

1.8 · p. 3

अनुष्टुप्

स्वर्गादित्योर्लिप्तगात्रे गतनप्तरि वक्षसि ।लॄकारः कृकलासेऽद्रावङ्गेऽक्ष्णि मकरे सुरे ॥

1.9 · p. 3

अनुष्टुप्

लीलागतौ लोचनास्थ्नि नागमातरि मातरि ।एकारस्तेजसि जले रात्रौ हर्म्योदरे हरौ ॥

1.10 · p. 3

अनुष्टुप्

व्योम्न्येकादशसंख्यायां दिनादौ मणिकुट्टिमे ।ऐकारो दिङ्मुखे हस्ते हरेऽद्रिशिखरे त्वचि ॥

1.11 · p. 3

अनुष्टुप्

ओकारः पद्मकुड्याम्बुश्रीदमेघेन्दुयोनिषु ।शक्रे जीवे विरिञ्चौ स्यादौकारस्त्वम्बिकासुते ॥

1.12 · p. 3

अनुष्टुप्

विशुद्धाङ्गेन्दुकलयोरनन्ते सिद्धपुष्पके ।अंशब्दो वक्रवाक्येऽतिदीर्धेऽञ्जलिनियोगयोः ॥

1.13 · p. 3

अनुष्टुप्

सप्तस्वरान्तमाने च परंज्योतिषि च स्मृतः ।अः शिखायां सिद्धमन्त्रे प्रग्रहेऽर्करथार्वणि ॥

1.14 · p. 4

अनुष्टुप्

चक्रे कुक्कुटमूर्ध्नीन्दुबिम्बे ब्रह्मेशविष्णुषु ।को ब्रह्मात्मानिलार्काग्निचित्तधीयमकेकिषु ॥

1.15 · p. 4

अनुष्टुप्

विष्णावाहतशब्देऽब्धौ सितवर्णे वसौ द्युतौ ।कं शिरोऽम्बुसुखे क्लीबं तत्रैव च कमव्ययम् ॥

1.16 · p. 4

अनुष्टुप्

किं प्रश्नाक्षेपकुत्सासु वितर्के च त्रिलिङ्गकम् ।किमव्ययं च कुत्सायां विकल्पप्रश्नयोरपि ॥

1.17 · p. 4

अनुष्टुप्

कुः स्त्री भुवि कु पापेऽल्पे कुत्सायां वारणेऽव्ययम् ।खः पुमान्गरुडे खड्गे स्वर्गे शान्तरसे कुणौ ॥

1.18 · p. 4

अनुष्टुप्

खमिन्द्रियसुखव्योमनक्षत्रक्षेत्रपत्तने ।कृपाफलकयोः शून्ये बिन्दौ संदेशरन्ध्रयोः ॥

1.19 · p. 4

अनुष्टुप्

गं गीते गा च गाथायां गो गन्धर्वगणेशयोः ।गौर्नागेऽर्के वृषे चन्द्रे वाग्भूदिग्धेनुषु स्त्रियाम् ॥

1.20 · p. 4

अनुष्टुप्

द्वयोस्तु रश्मिदृग्बाणस्वर्गवज्राम्बुलोमसु ।मेघे निदाघे किङ्किण्यां घण्टायां घट्टने च घः ॥

1.21 · p. 4

अनुष्टुप्

घं वाद्यामृतयोर्घा भूर्वार्ता घोरे तु घस्रिषु ।ङं क्लीबमञ्जने ना तु भैरवे विषये जने ॥

1.22 · p. 4

अनुष्टुप्

चस्तुरुष्के स्वरे चोरे चकोरे चन्द्रमस्यपि ।चा स्त्री शोभा शोणिते तु चं क्लीबे विमले त्रिषु ॥

1.23 · p. 4

अनुष्टुप्

स्याल्लिप्साच्छादनाब्देषु छं क्लीबे संवृतौ पुमान् ।त्रिष्वयं निर्मले नित्ये मलिने भेदकेऽपि च ॥

1.24 · p. 5

अनुष्टुप्

जो जवे विजये मेरौ शब्दे जेतरि मत्सरे ।जा स्त्रियां देववाहिन्यां योनिसागरवेलयोः ॥

1.25 · p. 5

अनुष्टुप्

जं कटीभूषणे पत्न्यां तेजस्यम्बुनि जन्मनि ।जुः कीर्त्यां संगरे जूर्ना जीवे व्योमपिशाचयोः ॥

1.26 · p. 5

अनुष्टुप्

जूः स्त्री वाण्यां झशब्दस्तु पुमान्धातरि हंसके ।प्रतापे भ्रमरे नष्टे चोरे झञ्झानिले मदे ॥

1.27 · p. 5

अनुष्टुप्

ञो व्यूहे विषये गर्वे लेपे मूर्ध्नि खरध्वनौ ।त्रिषूत्ताने मूढरूपे क्लीबे तु भयपद्ययोः ॥

1.28 · p. 5

अनुष्टुप्

ज्ञः प्राज्ञे त्रिषु ना चन्द्रसूनावात्मनि वेधसि ।टः पुमान् करटे धूमे चापेऽर्ककिरणे ध्वनौ ॥

1.29 · p. 5

अनुष्टुप्

कवाटावर्तयोः सूनौ भूम्यावृत्त्योस्तु टा स्त्रियाम् ।ठः शंकरे बृहद्ध्वाने ठं क्लीबे चन्द्रमण्डले ॥

1.30 · p. 5

अनुष्टुप्

स्तम्भने शासने चाथ त्रिषु शून्ये शठे दृढे ।डः पुमान्विषये शंभौ हासे त्रासे क्षये ध्वनौ ॥

1.31 · p. 5

अनुष्टुप्

शङ्खध्वनौ रौद्ररसे व्रीडावाचोस्तु डा स्त्रियाम् ।डं क्लीबे डामरे दुर्गे वटे डमरुकेऽपि च ॥

1.32 · p. 5

अनुष्टुप्

आन्दोलने च त्रिषु तु डशब्दो गायके जडे ।ढः पिशाचे भये काले रागे पान्थे ध्वनौ च ना ॥

1.33 · p. 6

अनुष्टुप्

ढक्कायां तु स्त्रियां क्लीबे ज्ञाने तूर्यमुखेऽपि ढम् ।त्रिष्वयं निर्गुणे गूढे सौम्ये सव्यापसव्ययोः ॥

1.34 · p. 6

अनुष्टुप्

णशब्दस्तु पुमाञ्जारे भैरवे कण्टके ध्वनौ ।णा स्त्रियां रजनीशय्याधेनुनासाकृपासु च ॥

1.35 · p. 6

अनुष्टुप्

णं सरोजदले ज्ञाने त्रिषु निस्तुषवस्तुनि ।तशब्दः पुंसि संभोगे निश्चये कोपपुच्छयोः ॥

1.36 · p. 6

अनुष्टुप्

धातुवादविधौ चोरे करुणायां तु ता स्त्रियाम् ।तच्छब्दः प्रकृतार्थोक्तौ त्रिषु हेतौ तदव्ययम् ॥

1.37 · p. 6

अनुष्टुप्

तेशब्दः क्रीडने स्त्री स्यात्क्रीडके त्वभिधेयवत् ।तृट्पिपासेहयोः स्त्री स्यात् थः पुंस्यूर्मिगिरीन्दुषु ॥

1.38 · p. 6

अनुष्टुप्

स्त्रीलिङ्गोऽयं तरङ्गिण्यां क्लीबे भयनिवारणे ।वाच्यलिङ्गस्तु धवले श्यामले पृथुलेऽपि च ॥

1.39 · p. 6

अनुष्टुप्

दः पुंसि दातरि छेदे दा स्त्रियां क्षान्तिदानयोः ।दं क्लीबे पानवैराग्यकलत्रेष्ववलोकने ॥

1.40 · p. 6

अनुष्टुप्

मेघलिङ्गस्त्वयं मूके गृहीते द्रावके शुचौ ।दर्शनज्ञाननेत्रेषु दृक् स्त्री द्रष्टरि तु त्रिषु ॥

1.41 · p. 6

अनुष्टुप्

धः पुंसीन्द्रे ध्वनौ ध्याने श्रीदे धन्वन्तरौ घटे ।धं वेश्मनि धने धान्ये बुद्धौ स्त्री धा च धिश्च धीः ॥

1.42 · p. 6

अनुष्टुप्

धूर्ना धूपे स्त्री तु कम्पे वित्ते भारे युगाग्रयोः ।हेरम्बे नः पुमान्ना स्त्री नाभौ नं ज्ञानवाद्ययोः ॥

1.43 · p. 7

अनुष्टुप्

वध्यसूक्ष्मपरिक्लिष्टशून्यभिन्नेषु नस्त्रिषु ।नुशब्दस्तु स्तुतौ स्त्री स्यान्नौः स्त्री तरणिकालयोः ॥

1.44 · p. 7

अनुष्टुप्

पः पुमान्पवने शैले प्रकाशे कौस्तुमे क्षणे ।शुभलग्नेऽथ पं क्लीबे हेम्नि पाः पातृपानयोः ॥

1.45 · p. 7

अनुष्टुप्

स्त्रीलिङ्गे त्वम्बुधारायां सुधायां सम्मतौ च पा ।पुस्त्रिष्वार्ते प्रसन्ने च पूः स्त्री पुरशरीरयोः ॥

1.46 · p. 7

अनुष्टुप्

पूरणे चाथ पुंशब्दः पुरुषे परमात्मनि ।फो झञ्झानिल आस्फोटे फूत्कारे वारणे रणे ॥

1.47 · p. 7

अनुष्टुप्

फा स्त्रियां निष्ठुरोक्तौ च कलाकेलिकुटीषु च ।अथ स्फारे परोक्षे च फशब्दो वाच्यलिङ्गकः ॥

1.48 · p. 7

अनुष्टुप्

बः कुम्भे वरुणे बिन्दौ विकल्पे खे गुरौ मदे ।विभूतिकारे कलहे पक्षे गर्भे च पर्वणि ॥

1.49 · p. 7

अनुष्टुप्

बा स्त्रियां काहलीवल्लीशृङ्खलास्वमले त्रिषु ।भः शंभौ भ्रमरे भावे शुक्रेंऽशौ जलदे पुमान् ॥

1.50 · p. 7

अनुष्टुप्

भा भुव्यलंकृतौ दीप्तौ स्त्रियां भाः किरणे द्युतौ ।क्लीबे तु गगने राशौ तारायां पुण्ड्रचक्रयोः ॥

1.51 · p. 7

अनुष्टुप्

भीः स्त्री भीत्यां खगे पुंसि स्थानभूम्योस्तु भूः स्त्रियाम् ।मः शंभौ धातरीन्द्रे ना चन्द्रे मासे च माः पुमान् ॥

1.52 · p. 7

अनुष्टुप्

मा स्त्री माने मृतौ वेलामेधाश्रीमध्यमातृषु ।माव्ययं प्रतिषेधे च जने तु स्यान्नपुंसकम् ॥

1.53 · p. 8

अनुष्टुप्

मुः पुंसि बन्धने पिङ्गकपिलाभिधवर्णयोः ।यस्त्यागे निलये वायौ यमे धातरि यातरि ॥

1.54 · p. 8

अनुष्टुप्

या स्त्रियां यानमञ्जर्योः शोभालक्ष्म्योश्च निर्वृतौ ।यच्छब्दः सर्वनामाख्यस्त्रिषु हेतौ यदव्ययम् ॥

1.55 · p. 8

अनुष्टुप्

ख्या स्त्री ख्यातौ प्रकथने ज्या मौर्वीमातृभूमिषु ।द्युर्नाकेऽप्यह्वि वह्नौ च स्वर्व्योम्नोर्द्योदिवौ स्त्रियाम् ॥

1.56 · p. 8

अनुष्टुप्

रः पुमान्पावके कामे क्षये वज्रे शयेऽप्यरौ ।रा स्त्रियां हेम्नि शालायामाशंसायां गतावपि ॥

1.57 · p. 8

अनुष्टुप्

रं क्लीबे रुधिरे मूर्ध्नि ध्यानव्योमाणुकुक्षिषु ।वक्त्रे भये च त्रिषु तु विरसे त्यागतीक्ष्णयोः ॥

1.58 · p. 8

अनुष्टुप्

रास्तु द्वयोर्धने स्वर्णे रिशब्दस्तु स्रवे क्षये ।स्त्री रुर्जालेच्छयोः कान्तौ रुर्ना युद्धे भये ध्वनौ ॥

1.59 · p. 8

अनुष्टुप्

स्त्री कामिनीवम्रिकयोः रूः स्वर्णे कामरूपिणि ।श्रीर्वेषरचनाशोभासंपत्सरलशाखिषु ॥

1.60 · p. 8

अनुष्टुप्

वाणीलक्ष्मीलवङ्गेषु विषे बिल्वेऽप्यथ त्रिषु ।जटायां प्रा प्रूरणे स्त्री स्रुग्घोमाङ्गे गतौ स्त्रियाम् ॥

1.61 · p. 8

अनुष्टुप्

लः खण्डने त्रिष्वदाने स्त्री नेन्द्रे लवणे तु लम् ।श्रमैक्यनाशनश्रेष्ठसाम्यान्तलवणेषु लिः ॥

1.62 · p. 8

अनुष्टुप्

वः पुमान्सान्त्वने वायौ संयमे वरुणे स्मरे ।वा स्याद्विकल्पोपमयोरेवार्थे च समुच्चये ॥

1.63 · p. 9

अनुष्टुप्

विश्चक्षुषि व्योम्नि वाते परमात्मनि पक्षिणि ।वैश्ये जने पुरीषे विट् क्रमात्पुंसि द्वयोः स्त्रियाम् ॥

1.64 · p. 9

अनुष्टुप्

स्वोऽस्त्री धने पुमाञ्ज्ञातौ त्रिष्वात्मीये स्वमात्मनि ।स्वरव्ययं च त्रिदिवे त्विट् कान्तिज्वालयोः स्त्रियाम् ॥

1.65 · p. 9

अनुष्टुप्

वल्के लवङ्गवल्के त्वग्द्वार्द्वारोपाययोः स्त्रियाम् ।शो वल्मीके शिवे कूर्मे भूपे शिष्ये तनूकृतौ ॥

1.66 · p. 9

अनुष्टुप्

शा स्त्रियां देवपूजायां शक्तौ शोभावरेण्ययोः ।रमायां चाथ शं क्लीबे शास्त्रे श्रेयसि मङ्गले ॥

1.67 · p. 9

अनुष्टुप्

कीर्तौ शक्रायुधे स्वर्गे शः परोक्षे त्रिलिङ्गकः ।शमव्ययं च सौख्यार्थे शिः शंभौ शिवशान्तयोः ॥

1.68 · p. 9

अनुष्टुप्

निर्वाणहिंसास्वापेषु षः स्वर्गे विषये च ना ।षा स्त्री रमायां षं क्लीबे गर्भमोक्षावसानयोः ॥

1.69 · p. 9

अनुष्टुप्

मर्षणे च त्रिलिङ्गस्तु परोक्षश्रेष्ठयोरयम् ।सः पुंस्युमासुते वायौ देहकान्तौ तु सा स्त्रियाम् ॥

1.70 · p. 9

अनुष्टुप्

सं क्लीबे स्यन्दनपथे ज्ञाने ध्याने निवारणे ।सन्सत्ये विदुषि श्रेष्ठे साधौ भवति च त्रिषु ॥

1.71 · p. 9

अनुष्टुप्

सत् क्लीबमृक्षे सूशब्दः प्रेरणे गर्भमोचने ।सेशब्दः सेवने स्त्री स्यात्सेवके त्वभिधेयवत् ॥

1.72 · p. 9

अनुष्टुप्

हः शंकरे हरौ हंसे रणरोमाञ्चवाजिषु ।गर्वे प्रचेतसि स्त्री तु हा त्यागे गतिवीणयोः ॥

1.73 · p. 10

अनुष्टुप्

हं क्लीबमस्त्रसुखयोः क्वणिते मणिरोचिषि ।परब्रह्मामन्त्रणयोस्त्रिषु तून्मत्तहास्ययोः ॥

1.74 · p. 10

अनुष्टुप्

संबोधने च हेशब्दो हा स्त्रियां परिदेवने ।हुं प्रश्ने रासभेदे च वितर्कहयदानयोः ॥

1.75 · p. 10

अनुष्टुप्

क्षः संरोधे विरोधे च क्षेमदुःस्वप्नयोश्च ना ।क्षा स्त्री क्षमायां निद्रायां क्षं क्लीबे क्षेत्ररक्षसोः ॥

1.76 · p. 10

अनुष्टुप्

अप्राचुर्यात्प्रयोगस्य लिङ्गं क्वचिदुपेक्षितम् ।एकाक्षरेषु शब्देषु तदूह्यं लक्ष्यवेदिभिः ॥

1.77 · p. 10

अनुष्टुप्